ഫിഫ്‌ത് എസ്റ്റേറ്റ്: ജനാധിപത്യ മതനിരപേക്ഷ വ്യവസ്ഥ ശക്തിപ്പെടുത്താനുള്ള ഒരു ശ്രമം

തിരുവനന്തപുരം പ്രസ് ക്ലബ്ബിൽ ഇന്ന് (ഏപ്രിൽ 27, 2011) നടത്തിയ പത്രസമ്മേളനത്തിൽ വിതരണം ചെയ്ത പ്രസ്താവനയുടെ പൂർണ്ണരൂപം ചുവടെ ചേർക്കുന്നു.

ഫിഫ്‌ത് എസ്റ്റേറ്റ് എന്ന പേരിൽ പുതിയൊരു പ്രസ്ഥാനത്തിന് തുടക്കമിടുകയാണ്. ഇന്ത്യൻ മതനിരപേക്ഷ ജനാധിപത്യം ഇന്ന് ഏറെ വെല്ലുവിളികളെയും പ്രതിസന്ധികളെയും നേരിട്ടുകൊണ്ടിരിക്കുകയാണ്. രക്ഷപ്പെടുത്താനാവാത്ത വിധം അത് അധ:പതനത്തിന്റെ പാതയിലാണോ എന്ന ന്യായമായ സംശയം ഉയർന്നിരിക്കുന്നു. പാർലമെന്ററി ജനാധിപത്യത്ത താങ്ങിനിർത്തുന്ന നിയമനിർമ്മാണസഭകൾ, നിർവ്വഹണവിഭാഗം,നീതിന്യായവ്യവസ്ഥ, മാധ്യമലോകം എന്നീ നാലു നെടും‌തൂണുകളും പരസ്പരം പ്രതിപ്രവർത്തിക്കുകയും തിരുത്തുകയും അങ്ങനെ വ്യവസ്ഥ മൊത്തത്തിൽ സം‌രക്ഷിക്കപ്പെടുകയും ചെയ്യുമെന്നാണ് കരുതപ്പെട്ടിരുന്നത്. ഏറെ ദൌർബല്യങ്ങളോടെയാണെങ്കിലും കാര്യങ്ങൾ ആ ദിശയിൽ പുരോഗമിക്കുന്നുണ്ടെന്ന പ്രതീതി സൃഷ്ടിക്കപ്പെടുകയും ചെയ്തിരുന്നു. പക്ഷെ ഈ നാലു നെടും‌തൂണുകളും അഴിമതി, നിക്ഷിപ്തതാല്പര്യ സം‌രക്ഷണം, കെടുകാര്യസ്ഥത തുടങ്ങിയ അനവധി ദുഷ്പ്രവണതകളിൽ മുങ്ങിത്താണുകൊണ്ടിരിക്കുന്നു എന്ന ഭീകര യാഥാർത്ഥ്യമാണ് സമീപകാല സംഭവവികാസങ്ങളിലൂടെ മറനീക്കി പുറത്തു വന്നുകൊണ്ടിരിക്കുന്നത്. ഏറ്റവും പ്രധാനപ്പെട്ട തിരുത്തൽ ശക്തിയാവുമെന്ന് പ്രതീക്ഷിച്ചിരുന്ന നീതിന്യായവ്യവസ്ഥയുടെ പതനമാണ് ഇപ്പോൾ ഏവരെയും ഏറ്റവുമധികം ആശങ്കാകുലരാക്കിയിരിക്കുന്നത്.

പാർലമെന്ററി ജനാധിപത്യമല്ലാതെ ഇന്ന് ആഗോളതലത്തിൽ തന്നെ മറ്റൊരു രാഷ്ട്രീയ സമ്പ്രദായം സ്വീകാര്യമായി നിലവിലില്ല. ഇന്ത്യൻ ജനാധിപത്യം ശൈശവാവസ്ഥയിലാണെങ്കിലും അതിന്റെ സങ്കീർണ്ണതയും ബൃഹത്‌സ്വഭാവവും നിമിത്തം ലോകശ്രദ്ധയിൽ നിൽക്കുന്ന ഒന്നാണ്. അതിന് ഇപ്പോൾ സംഭവിച്ചുകൊണ്ടിരിക്കുന്ന അപചയത്തിന് തടയിടാനും സ്തംഭനാവസ്ഥയെ മറികടന്നുകൊണ്ട് മുന്നോട്ടുള്ള പാതയിലേക്ക് തിരിച്ചുവിടാനും അടിയന്തിരമായ ഇടപെടൽ ആവശ്യമുണ്ട്.

ജനാധിപത്യവ്യവസ്ഥയുടെ നാലു നെടും‌തൂണുകൾക്കും സംഭവിച്ചിട്ടുള്ള അപചയത്തെ മറികടക്കാനും അതിനെ മുന്നോട്ടു കൊണ്ടു പോകാനും ഒരു അഞ്ചാം തൂണ് -- ഫിഫ്‌ത് എസ്റ്റേറ്റ് -- അതാണിവിടെ വിഭാവന ചെയ്യപ്പെടുന്നത്. അധികാര രാഷ്ട്രീയത്തിൽ പ്രവേശിക്കാതെ, രാഷ്ട്രീയ പാർട്ടിയാവാതെ, ഒരു തിരുത്തൽ ശക്തിയും മാർഗ്ഗദർശക ശക്തിയുമായി നിൽക്കുന്ന ഒരു രാഷ്ട്രീട്രീയവേദി -- സിവിൽ സമൂഹത്തിന്റെ തലത്തിൽ നിന്നു പ്രവർത്തിക്കുന്ന ഒരു പ്രസ്ഥാനം. പ്രതിഫലം പറ്റുന്ന പ്രവർത്തകരില്ലാതെ, സന്നദ്ധപ്രവർത്തനംകൊണ്ടു നിലനിൽക്കുന്ന ഒരു പ്രസ്ഥാനമായിരിക്കും ഇത്. തികച്ചും സുതാര്യവും നിയമവിധേയവുമായിരിക്കും ഇതിന്റെ പ്രവർത്തനശൈലി. എല്ലാ തരത്തിലുള്ള പ്രവർത്തന റിപ്പോർട്ടുകളും ചർച്ചകളും അപ്പപ്പോൾ വെബ്‌സൈറ്റിൽ പ്രസിദ്ധീകരിക്കും. എല്ലാ തലത്തിലുള്ള കമ്മിറ്റികളിലും പത്രക്കാർ ഉൾപ്പെടെ താല്പര്യമുള്ള ആർക്കും പങ്കെടുക്കാൻ അവസരം ലഭിക്കും.

വില്ലേജ് ആഫീസ് മുതൽ മുകളിലേക്ക് അധികാരഘടനയുടെ എല്ലാതലത്തിലും സുതാര്യത ഉറപ്പു വരുത്തുക, അഴിമതിയും കെടുകാര്യസ്ഥതയും തുറന്നു കാട്ടുക, സാമൂഹ്യനീതി ഉറപ്പുവരുത്താനുള്ള നടപടികൾക്കായി സമ്മർദ്ദം ചെലുത്തുക തുടങ്ങിയ പ്രവർത്തനങ്ങളാണ് ഈ പ്രസ്ഥാനം ഏറ്റെടുക്കുക. ഇപ്പോൾ പ്രാബല്യത്തിലുള്ള അറിയാനുള്ള അവകാശ നിയമവും പ്രാബല്യത്തിൽ വന്നേക്കാവുന്ന ജനലോക്‌പാൽ ബില്ലും ഫലപ്രദമായി നടപ്പിലാക്കപ്പെടുന്നതിന് ഇതുപോലുള്ള പ്രസ്ഥാനങ്ങളുടെ വിപുലമായ ശൃംഖലകൾ ആവശ്യമാണ്. ഈ പ്രസ്ഥാനം ആ തലത്തിലുള്ള ഉത്തരവാദിത്വങ്ങൾ ഏറ്റെടുക്കും. ജനാധിപത്യമതനിരപേക്ഷ വ്യവസ്ഥയെ ശക്തിപ്പെടുത്താനും സാമൂഹ്യനീതിക്കു വേണ്ടി യത്നിക്കാനും ആവശ്യമായി വരുന്ന എല്ലാത്തരം പ്രവർത്തനങ്ങളും പ്രസ്ഥാനം ഏറ്റെടുക്കും. പ്രസ്ഥാനത്തിന്റെ അടിസ്ഥാന നിലപാടുകൾ, പ്രവർത്തനപദ്ധതി, സംഘടനാ രീതി എന്നിവ പ്രസ്ഥാനത്തിന്റെ വെബ്‌സൈറ്റിൽ ലഭ്യമാണ്. വെബ്‌സൈറ്റ് അഡ്രസ് ഇതാണ്:

www.fifth-estate.org

താഴെ ഒപ്പിട്ടിട്ടുള്ളവരുടെ കൂട്ടായ്മയാണ് ഇങ്ങിനെയൊരു പ്രസ്ഥാനത്തിന് മുൻ‌കയ്യെടുക്കുന്നത്. ഇത്തരം ഒരു പ്രസ്ഥാനത്തിൽ താത്‌പര്യമുള്ളവരിൽ ചെറിയൊരു വിഭാഗത്തെ മാത്രമേ ഞങ്ങൾക്ക് ബന്ധപ്പെടാനായിട്ടുള്ളു. ഈ പ്രസ്ഥാനവുമായി സഹകരിക്കാൻ താത്‌പര്യമുള്ള എല്ലാവരും എത്രയും വേഗം വെബ്‌സൈറ്റ് അഡ്രസിൽ ബന്ധപ്പെടണമെന്ന് താത്‌പര്യപ്പെടുന്നു.

ആനന്ദ്, ബി.ആർ.പി. ഭാസ്കർ, സാറാ ജോസഫ്, സക്കറിയ, സി.ആർ. പരമേശ്വരൻ, എം.ജി.എസ്.നാരായണൻ, കെ.എം.സലിം‌കുമാർ, കെ.എം.റോയ്, ഡോ.ജെ.ദേവിക, ഡോ.എം.ഗംഗാധരൻ, ഹമീദ് ചേന്ദമംഗലൂർ, വി.സി.ശ്രീജൻ, ടി.പി.രാജീവൻ, എം.എൻ.കാരശ്ശേരി, കെ.ആർ.മീര, എൻ.എം.പിയേഴ്‌സൺ, കെ.അരവിന്ദാക്ഷൻ, ഡോ.വി.കെ.വിജയകുമാർ, ജീവൻ ജോബ് തോമസ്, കവിത ബാലകൃഷ്ണൻ, പി.കേശവൻ നായർ, കെ.വേണു, കെ.ജി.ജഗദീശൻ, ഡോ.സെബാസ്റ്റ്യൻ ചിറ്റിലപ്പിള്ളി, ഇ.കരുണാകരൻ, പി.എം.മാനുവൽ

കുറിപ്പ്: പ്രസ്താവനയിൽ പരാമർശിച്ചിട്ടുള്ള വെബ്‌സൈറ്റ് പ്രവർത്തനക്ഷമമാകാൻ മൂന്നൊ നാലൊ ദിവസങ്ങൾ കൂടി എടുക്കും.